BOHOL-Patay ang usa ka amahan human kini gisumbag sa nawng sa iyang kaugalingong anak sulod sa ilang panimalay sa Centro Ingod Tubigon, Bohol niadtong Pebrero 9.
Giila ang biktima nga si Santos Leria, 52-anyos samtang ang suspek nga anak kay mao si John Herbert Leria, 27-anyos.
Basi sa inisyal nga imbistigasyon sa mga sakop sa kapulisan sa Tubigon nga natulog ang suspek sa maong higayon ug gituohang nasamok ang iyang pagkatulog sa iyang amahan.
Tungod niini, kalit nga gisumbag ni John ang ulo sa biktima ug dayong sibat samtang ang biktima kay gi-atake sa kasing-kasing ug gidali pa pagdala sa tambalanan apan nakabsan ra gayud sa kinabuhi human sa unom ka oras sukad nadala kini sa hospital.
Apan, wala ra usab nagdugay kay nadakpan ra ang suspek ug anaa na kini sa kustodiya sa kapulisan ug nag-atubang sa kasong Parricide.
Gidugang usab sa kapulisan nga adunay record na ang batan-ong Herbert sa kasong pagpangawat ug gituong sa mga kabanay ug silingan nga usa kini nga drug user.
