Magpahigayon ang naval ug air units gikan sa Pilipinas, Canada, ug Estados Unidos og 7th Multilateral Maritime Cooperative Activity (MMCA) sulod sa exclusive economic zone (EEZ) sa Pilipinas.
Gilauman nga ang ehersisyo makapauswag sa kooperasyon ug interoperability sa mga partisipante nga pwersa, pagpalig-on sa kalig-on sa rehiyon, ug pagtuboy sa mga prinsipyo sa usa ka gawasnon ug bukas nga Indo-Pacific.
Matod ni Armed Forces of the Philippines (AFP) chief Gen. Romeo Brawner Jr., nga ang maong ehersisyo nagpakita sa maayong intensiyon sa mga partisipanteng nasud aron mas mapalig-on pa ang kooperasyon sa matag nasud subay sa internasyonal nga balaod.
Gihisgutan usab ni Brawner nga ang MMCA nagpasiugda og tumong sa pagpanalipod sa katungod sa kagawasan sa paglawig, overflight, ug maritime nga katungod, sumala sa mga prinsipyo sa United Nations Convention on the Law of the Sea (UNCLOS).
Ang 7th MMCA nagsunod sa miaging mga ehersisyo sa rehiyon, diin ang 1st MMCA nagsugod niadtong Abril 2024, ug gisundan sa mga bulan sa Hunyo, Agosto, Setyembre, ug Disyembre sa samang tuig.
Samtang ang 6th MMCA gipahigayon niadtong Pebrero 5 ning tuiga, ug ang kasamtangang ehersisyo gihimo sa West Philippine Sea (WPS), ilabi na sulod sa joint operational area sa Northern Luzon Command (NOLCOM).
Samtang, gikompirmar usab ni AFP public affairs office chief Col. Xerxes Trinidad, nga nagpadayon ang mga ehersisyo apan nagdumili siya sa paghatag og mga detalye bahin sa piho nga mga unit ug uban pang mga partisipante alang sa mga hinungdan sa seguridad.