CEBU CITY- Nawad-an og panimalay ang anaa sa kapin sa 800 ka mga indibidwal human sa dakong sunog sa Brgy. Mambaling, dakbayan sa Sugbo atol sa ikaduhang adlaw sa Fire Prevention Month Domingo, Marso 2.
Sa interview sa Bombo Newsteam kang SFO2 Wendell Villanueva ang tigpamaba sa Cebu City Fire Office, gitino niini nga ang sunog, miigo sa usa ka komunidad nga daghang lumolupyo sa Sitio Naba, Brgy. Mambaling, nilungtad og gibana-banang duha ka oras ug nasunog ang P1.5 milyones nga kantidad sa mga kabtangan.
Nadawat sa kabomberohan sa dakbayan sa Sugbo ang alarma sa sunog ala 1:20 sa kaadlawon, ug giisa dayon kini ngadto sa 2nd alarm tungod kay paspas nga nikatap ang kalayo sa duol nga mga balay, kadaghanan niini ginama sa light materials.
Apan, alas 2:05 sa kaadlawon, gibana-bana nga 40 minutos human sa pag-abot sa dapit, giisa kini sa kabomberohan sa 3rd alarm tungod kay nakaapekto na ang sunog sa kinatibuk-ang 2,700 square meters.
Ang ikaduha ug ikatulo nga alarma nagpasabot nga labing menos walo ug 12 ka firetrucks ang gikinahanglan aron mapalong ang sunog.
Maayo na lang kay nakontrolar sa kabomberohan ang kalayo alas 2:29 sa kaadlawon ug mga 30 minutos ang milabay, alas 3:05 sa kaadlawon, opisyal nilang gideklarar nga fireout.
Sa inisyal nga mga kaplag gikan sa mga imbestigador sa kabomberohan nagbutyag nga ang kalayo naggikan sa usa ka balay nga gipanag-iya sa usa ka Jorani Daomani.
Hinuon wala pa matino ang hinungdan sa sunog hangtod ning balita.
Sa pikas bahin, nahinabi sa Bombo Newsteam si Portia Basmayor, ang OIC sa DSWS, dinihi iyahang gisaysay nga ang pinakaulahing ihap nagpakita nga 105 ka mga balay ang naapektuhan sa sunog, diin 100 niini ang hingpit nga naugdaw.
Nahimong hinungdan, nga wala nay pinuy-anan ang dili mominos 800 ka mga indibidwal, diin kadaghanan niini kasamtangang nagpuyo sa duol nga mga gym ug eskwelahan sa barangay.
