MANDAUE CITY- Wala maapektuhan ang kandidatura sa pagka mayor sa Mandaue City, Cebu ni Jonas Cortes sa desisyon sa Court of Appeals nga gibasura ang iyang petition for temporary restraining order (TRO) batok sa desisyon nga nagsuspenso kaniya og usa ka tuig.
Kini maoy gipahibalo ni Atty. Jamaal James Calipayan, ang City Administrator sa Mandaue City ug usa sa mga legal counsel ni Cortes sa eksklusibong pakighinabi sa Bombo Radyo Cebu.
Dugang pa niya nga sa pagkakaron hulaton na lang nila kini tungod kay kabahin na kini sa ilang ‘legal action’ nga ilang gipangandaman.
Si Cortes gisuspenso tungod kay gitudlo niya si Camilo Basaca isip social welfare officer bisan pa man sa iyang unqualified status.
Ang CA, sa desisyon nga gipirmahan ni Associate Justice Emilio Rodolfo Legaspi III, pinetsahan og Pebrero 28, walay nakitang merito sa petisyon ni Cortes alang sa TRO.
Dugang niini, nga ang mga desisyon sa Ombudsman ipatuman dayon bisan pa kon adunay usa ka apela, ug nga ang Ombudsman usa ka Constitutional body.
Sa sayo pa, niadtong Agosto 12, 2024, gihukman sa Ombudsman si Cortes nga sad-an sa gross misconduct and prejudicial to the best interest of the service, nga nagpahamtang sa iyang pagkasuspenso sa katungdanan sulod sa usa ka tuig.
