CEBU CITY- Gidakop ang 22-anyos nga estudyante ug drayber sa motorsiklo human gitulis ug gilugos ang babayeng pasahero sa hilit nga dapit sa SRP, Brgy. Mambaling, dakbayan sa Sugbo, kagahapon, Marso 13, 2025
Ang babaye nga biktima giila nga 21-anyos, adunay live-in partner, Therapist, ug residente sa Purok Kijok, Brgy., Tangke, Talisay City Cebu.
Samtang ang suspek giila nga si Nathaniel Manto, 22-anyos, lalaki, estudyante, ug residente sa 662 Burgos St., Brgy., Poblacion, Talisay City Cebu.
Base sa imbestigasyon sa Mambaling Police Station, subay sa reklamo sa biktima nga kalit nga mihunong ang suspek sa hilit ug ngitngit nga dapit, gihulga kini og screwdriver, ug gikuha ang iPhone 11 niini, nga nagkantidad og P20,000, lakip ang P2,500 nga cash.
Human sa pagpanulis, gidala siya sa hilit nga dapit ug didto gilugos.
Daling mitaho sa Mambaling police station ang biktima ug atol sa follow-up nasikop ang suspek ug narekober usab ang iyang cellphone, screwdriver, ug ang motorsiklo sa suspek.
Ang suspek miangkon sa krimen ug niingon nga iya kining gihimo aron makabayad sa iyang tuition.
Mag-atubang siya og kasong Robbery With Rape.
