LAPU-LAPU CITY,CEBU- Mokabat og 3,000 hangtud sa 5,000 ka mga indibidwal ang nisalmot sa selebrasyon sa ika-504th kadaugan sa Mactan, tataw sa pagbalik sa kinabuhi sa kasaysayan sa Mactan Shrine, didto sa Dakbayan sa Lapu-Lapu, kagahapon, Dominggo, Abril 27, 2025.
Sa usa ka ikslusibong pakighinabi sa Bombo Radyo Cebu Newsteam kang Police Lieutenant Colonel Christian Torres, ang tigpamaba sa Lapu-Lapu City Police Office (LCPO), iyahang gikompirma nga hapsay gayud ang kinatibuk-ang kalihokan sa maong selebrasyon sukad sa unang adlaw sa pagsugod, hangtud sa pagkahuman niini.
Nakatala lamang sila og dyutay nga aberya atol sa gipahigayong concert niadtong miaging adlaw, tungod sa kadaghan sa mga tawo nga nitambong, apan dali kining nasulbad pinaagi sa ilang paspas nga aksyon.
Gidugang ni Torres, ang usa sa hinungdan nganu naka deklara sila og ” generally peaceful” sa maong panghitabo, kay tungod tinuig na nila kining pagahimuon,ug ila usab nga gihimong basehan ang ilang mga kakulian sa unang tuig sa susamang kalihukan, ug mas gipalig-on nila kini sa kasaulogan karong tuiga.
Sa pikas bahin, gitataw usab ni Torres nga padayun ang ilahang pagpatuman og bug-at nga seguridad bisan paman nahuman na ang -504th kadaugan sa Mactan, ilabi na nga nagkaduol na ang adlaw nga piniliay.
Subay niini, ipadayon nila ang heightened alert, alang sa hugot nga pagpangandam sa umaabot nga piniliay karong Mayo 12, aron mas sayon ang pagkab-ot sa kahapsay sa maong adlaw.
Dugang pa niya nga nagpahigayon usab sila og mga tigom sa LGU ug COMELEC aron masiguro ang hapsay nga piniliay.(BOMBO IRENE ARDIENTE)
