LAPU-LAPU CITY, CEBU- Nagpagawas og pahimangno ang Lapu-Lapu City Police Office (LCPO) ngadto sa publiko nga hugot nga gidili ang mga walay otorisadong rally, picketing activities, road obstruction, ug bisan unsang matang sa kagubot sulod sa security ug restricted areas atol sa ika-48 nga ASEAN Summit 2026.
Sa ilang press statement Mayo 8, gipasabot sa LCPO nga estriktong ipatuman ang balaod batok sa bisan kinsa o grupo nga makalapas sa kasamatangan nga mga ordinansa ug security protocols nga gitakda alang sa maong internasyonal nga kalihokan.
Matud pa sa kapulisan, tumong sa hugot nga seguridad ang pagsiguro sa malinawon, luwas, organisado, ug hapsay nga pagpahigayon sa summit, lakip ang pagpanalipod sa mga delegado, bisita, residente, ug sa kinatibuk-ang publiko.
Nanawagan usab ang LCPO sa kooperasyon, pagsabot, ug pagbantay sa publiko aron mapadayon ang kalinaw sa tibuok gidugayon sa ASEAN Summit 2026.
Dugang pa nila, “Security is a shared responsibility,” samtang giawhag ang publiko nga motuman sa mga regulasyon ug makigtambayayong sa mga otoridad alang sa kalampusan ug kaluwasan sa maong internasyonal nga event.
