Nakahatag og dakong kabalaka ang pagkasikop sa usa ka giingong Chinese spy duol sa Commission on Elections (Comelec) dili lang sa nagsingabot nga Mayo 2025 National ug Local Elections kon dili lakip na sa seguridad sa nasod.
Kini ang gipahayag ni Senador Risa Hontiveros human nasikop sa mga personahe sa National Bureau of Investigation (NBI) ang usa ka Chinese national nga adunay espiya nga kagamitan, partikular ang International Mobile Subscriber Identity (IMSI) catcher, nga nagtugot niini nga maka-intercept sa mga text messages sa palibot.
Matod ni Hontiveros, kung mapamatud-an nga espiya ang dinakpan nga Chinese national, dako kini og epekto sa atong relasyon sa China.
Ang pamahayag sa senador, nga nag-ingon nga nanghilabot ang China sa teritoryo sa nasud ug bisan sa eleksyon niini.
Mao nga giingon ni Hontiveros nga kinahanglan nga magmabinantayon ang gobyerno ug dili tugutan nga maimpluwensyahan ang atong politika, nasudnon nga seguridad, ug demokrasya.
Giinsister usab ni Senate Special Committee on Maritime and Admiralty Zones Chairman Senator Francis Tolentino nga tinuod ang iyang mga gibutyag tungod kay dili kini ang unang higayon nga nanghilabot ang China sa piniliay.
Gani ang 194 page report gikan sa parlamento sa Canada usa ka pruweba nga nanghilabot usab ang China sa ilang mga eleksyon kaniadtong 2019 ug 2021, dugang sa mga nasud sa Australia ug New Zealand.
Samtang atol sa press conference, si Senador Alan Peter Cayetano nipadayag usab og kabalaka sa pagpanghilabot sa China sa piniliay sa nasod.
