Patay ang usa ka babaye, sa amihanang Greece nga lungsod sa Thessaloniki human ang usa ka bomba nga iyang gidala nibuto sa iyang mga kamot.
Sumala sa mga kapulisan sa nahisgutang dapit, ang maong 38-anyos nga biktima, nisulay sa pagbutang sa aparato sa gawas sa bangko, ug nagplano nga itanom kini sa ATM, apan, nibuto kini sa iyahang kamot hinungdan sa pagkamatay ini, ug nakaguba usab sa daghang mga tindahan ug mga sakyanan ang maong panghitabo.
Dugang niana, ang babaye nailhan sa kapolisan tungod sa iyahang usa ka kriminal nga record nga adunay pagkalambigit sa nangaging mga pagpanulis, ug gikatahong giimbestigahan sa mga awtoridad ang mga link sa mga extremist left group.
Subay sa panghitabo, gi-cordon sa mga pulis ang lugar human ang duha ka organisasyon sa Greek media nakadawat mga pasidaan nga tawag nga adunay usa ka eksplosibo nga aparato.(Bombo Irene Ardiente)
