Nilusad og ‘Kadiwa’ program alang sa mga Pilipinong mananagat sa West Philippine Sea (WPS) ang Philippine Coast Guard (PCG) ug Bureau of Fisheries and Aquatic Resources (BFAR).
Ang bag-ong inisyatiba gitawag og “Kadiwa ng Bagong Bayaning Mangingisda (KBBM) Program”.
Tumong sa maong programa nga madasig ang mas daghang Pilipino nga mangisda sa WPS, partikular sa palibot sa Panatag o Scarborough Shoal bisan pa sa pagpanghasi sa mga barko sa China.
Sa samang paagi, ang PCG ug BFAR nagtinguha nga mapalig-on pa ang presensya sa mga Pilipino sa kadagatan sa kasadpang baybayon sa atong nasud.
Matod sa tigpamaba sa PCG for the West PH Sea Commodore Jay Tarriela, gipadala ang fish carrier nga gipanag-iya sa gobyerno nga MV Mamalakaya aron dad-on ang programa ngadto sa mga mangingisda nga Pilipino diin milawig duol sa Panatag shoal niadtong Mayo 9, aron makapalit sa ilang dinakpang isda ug mihatag usab og fuel subsidies.
Pagtungtong sa hapon, nakapalit na ang Mamalakaya og 20 ka toneladang presko nga mga dinakpang isda nga gikonsiderar nga maayong pagsugod sa programa.
Gibutyag usab sa opisyal sa PCG nga target sa programa nga mapalambo pa ang panginabuhian sa mga mangingisda nga Pilipino dungan sa pagdugang sa suplay sa isda sa atong nasud ug pagpasiugda sa aktibong mga kalihokan sa pagpangisda sa WPS.
Sa laing bahin, ang barko sa PCG nga BRP Gabriela Silang ug usa sa mga aircraft niini ang gipakatap usab aron sa paghatag og suporta ug pag-obserbar sa nasangpit nga aktibidad.
