Taktak na sa NBA Playoffs ang defending champion nga Boston Celtics human kini gikuso-kuso sa New York Knicks sa Eastern Conference Semifinals match-up niini niadtong Sabado, Mayo 17 (oras sa Pilipinas).
Gitapos sa Knicks ang serye sa standing nga 4-2 sa homecourt niini sa Madison Square Garden sa New York City.
Mao kini pinakaunang pagbalik sa Knicks sa Eastern Conference Finals sulod sa 25 ka tuig.
Sa Game 6 niini, unom ka nga Knicks players ang mitala og double-figures stats nga gipangulohan ni point guard Jalen Brunson ug small forward OG Anunoby nga adunay 23 puntos matag usa.
Mitampo sab sila Mikal Bridges sa 22 points; Karl Anthony-Towns sa iyang 21 points; Josh Hart sa iyang triple-double nga 10 points, 11 rebounds, ug 11 assists.
Gikatakdang makasumpaki sa Knicks ang Indiana Pacers sa ilang best-of-seven series.
