Nanawagan si Cebu Archbishop Jose Palma sa publiko nga mas mahibaw-an ang HIV/AIDS ug tubagon uban ang gugma ug pagsabot, taliwala sa nagkataas nga kaso nga gitaho sa Department of Health (DOH).
Gikan sa Enero hangtod Marso 2025, ang DOH nakatala og gibana-banang 57 ka bag-ong kaso sa HIV kada adlaw.
Hinungdan nga mi-awhag kini sa publiko alang sa paghimo og lakang ug magbinantayon sa mga lihok hilabi na sa matang sa lawasnong kalipay.
Dugang pa niini nga kabahin na sa panaw sa kinabuhi ang reyalidad sa kahimtang sa panglawas apan gikinahanglang ipasubay usab sa makatawhanon ug mosanong uban ang gugma.
Gipasiugda usab ni Palma nga ang HIV mapugngan, ang mga epekto niini madumala, ug ang mga apektado mahimong suportahan pinaagi sa tukma nga mga interbensyon.
Ingon man nga sa dihang gipangutana kini kung usa makonsiderar ba nga silot ang HIV o AIDS kay hugot niya kining gisalikway ang maong ideya.
Gumikan matud sa arsobispo nga nagpuyo kita sa dili perpektong kalibutan, nga gipalibutan sa mga timailhan sa ”imperfection.”
Gihimug-atan usab niini nga panginahanglan sa kooperasyon tali sa Simbahan ug sa siyentipikanhong komunidad, nga nagpunting sa kamahinungdanon sa preventive measures ug mga tambal nga makakontrol sa virus sa dili pa kini mouswag ngadto sa AIDS.
Ingon man sa saktong mga aksyon, ang epekto sa HIV mahimong makunhuran. Ug ang Simbahang Katoliko, pinaagi sa Committee on Health, Caritas, ug uban pang organisasyon, nagpadayon sa pagtanyag og suporta sa mga indibidwal nga anaa sa krisis.
