CEBU CITY- Patay diha-diha ang usa ka lalaki human gipusil sa duha ka wala mailhing lalaki nga nagsakay sa motorsiklo nga mas nailhan karon nga riding-in-tandem sa Carlock St, corner B.Aranas St., Brgy. Sanicholas Proper, Cebu City.
Ang biktima, giila sa kapulisan nga si Ronnie Ayaay Lawas, 38 anyos, taga Kastilaan, Brgy. Ermita, ning syudad.
Nasayran pa nga bag-ohay lang kining nakagawas sa prisohan, apan wala pa matino sa mga otoridad kung unsa nga kaso ang iyang giatubang kaniadto.
Matud pa sa saksi nga si Alyas Sabel, atol sa pakighinabi sa Bombo Newsteam kanya, nga nagsugat ang e-bike nga gisakyan sa biktima ug ang mga suspetsado.
Kalit lang namusil ang backrider ug makadaghan kini nga niigo sa lawas sa biktima.
Apan, bisan tuod naigo na sa daghang bala, nakaginhawa pa og gamay ang biktima ug nakalakaw pa og pipila ka metros.
Apan gisundan kini sa riding-in-tandem ug gitiwasan diha mismo sa kalsada.
Human masiguro nga wala nay kinabuhi ang biktima, misibat dayon ang mga kriminal padulong sa wala pa matumbok nga direksyon.
Karon, padayon pa ang hot pursuit operation sa kapulisan, samtang gisusi usab ang posibleng motibo sa krimen ug ang tinuod nga pagkatawo sa duha ka suspek.
