Nagpalapad sa mga benepisyo ang Philippine Health Insurance Corporation (PhilHealth) alang sa mga pasyente nga adunay chronic kidney disease (CKD) ug uban pang seryoso nga mga sakit, lakip na ang hemodialysis, peritoneal dialysis, kidney transplant, ug emergency outpatient care.
Matod ni Dr. Israel Francis Vargas, Senior Vice President sa Health Finance Policy Sector sa PhilHealth, ang gidaghanon sa mga end-stage renal disease nga kaso sa nasud nisaka, busa, nagkinahanglan og mas lapad nga suporta.
Gikan sa niaging 90 ka mga sesyon, ang tinuig nga coverage alang sa hemodialysis gipataas ngadto sa 156, katumbas sa tulo ka mga sesyon kada semana. Ang reimbursement nga kantidad sa matag sesyon gipasaka usab gikan sa kanhi P2,600 ngadto sa P6,350, nga nagdala sa kinatibuk-ang benepisyo sa matag miyembro ngadto sa halos P1 milyon matag tuig.
Samtang, gipalapdan usab ang Z-Benefit Package alang sa kidney transplant, diin sa kanhing P600,000, niabot na sa P2.1 milyones ang coverage sa mga bata, ug kapin sa P1 milyones sa mga hamtong. Ang mga transplant gikan sa namatay nga mga donor gitabonan usab, dugang sa buhi nga mga donor.
Lakip usab sa benepisyo ang pag-atiman sa post-transplant sama sa maintenance medications ug laboratory tests, nga gikan sa P600,000 ngadto sa P660,000 alang sa mga hamtong, ug hangtod sa P1.7 milyones sa unang tuig sa mga bata.
Gawas sa mga sakit sa kidney, ang PhilHealth nilusad usab og bag-ong outpatient emergency care benefit. Kini karon naglangkob sa mga pasyente nga gitambalan sa ER bisan kung sila wala ma-admit. May benepisyo usab alang niadtong adunay atake sa kasingkasing nga nagkantidad og P130,000 alang sa tambal ug hangtod sa P530,000 alang sa angioplasty. | Bombo Irene Ardiente
