CEBU CITY- Nanumpa na ang bag-ong Mayor sa Dakbayan sa Sugbo nga si Mayor Nestor Archival ug Bise Mayor-elect Tomas Osmeña, upat ka adlaw sa dili pa ang pormal nga inagurasyon sa Hunyo 30, sa Plaza Sugbo karung adlawa Huwebes, Hunyo 26, 2025.
Giubanan sila sa mga napili nga konsehal sa BOPK.
Sa iyang mensahe, nanawagan si Archival sa panaghiusa aron matukod pagbalik ang Sugbo isip numero uno.
Iyang gipasabot nga sama sa construction site, nagkinahanglan siya og tabang sa tanang eksperto sa lokal nga kagamhanan.
Gipasiugda ni Archival ang iyang background isip usa ka engineer, usa ka tawo nga nagtan-aw sa mga blueprint, direksyon, ug mga plano sa dili pa molihok.
Ang kalihokan gisugdan pinaagi sa usa ka misa nga gipangulohan ni Arsobispo Jose Palma.
Nitambong usab si Gov. elect Pamela Baricuatro apan nibiya dayon human sa misa.
Gisundan kini sa usa ka martsa sa mga opisyal ug usa ka interfaith nga pag-ampo.
Kung diin, si Konsehal-elect Sisinio Andales maoy unang nanumpa, gisundan nila ni Alvin Arcilla ug Nice Archival.
Misunod sila si Michelle Abella, Jose Lorenzo Abellanosa, samtang wa makatambong si Paul Labra.
Ulahi nga nanumpa si Bise Mayor-elect Osmeña uban sa iyang pamilya ug mga vendor sa Carbon Market.
