Nipahibawo ang Department of Justice nga posibleng modaghan pa ang mga motestigo sa International Criminal Court (ICC) batok ni kanhi Presidente Rodrigo Roa Duterte, ug gikomprimar kini ni Justice Secretary Jesus Crispin Remulla, nunot sa iyang pamahayag kalabot sa mga testigo nga ipadala sa The Hague, Netherlands.
Sa pagkakaron, basi sa iyang gipaambit, adunay tulo (3) ngadto sa upat (4) ka indibidwal ang ilang gitabangan ug dili malalis nga modaghan pa ang maong gidaghanon.
Busa, iyang gipasalig nga ang International Criminal Court makasalig kanila nga magpadayon sa pagtinabangay kung mangayo pa kini kanila. Hinuon iyang giklaro nga walay pormal nga dokumento o papeles nga gipadala ang ICC sa koordinasyon nga gihimo tali sa departamento ug sa nahisgutang korte sa gawas sa nasud.
Gumikan niini, subling gipasabot ni Department of Justice Secretary Jesus Crispin Remulla nga husto ang nasod nga itugyan sa ICC ang kaso ni kanhi Presidente Duterte.
Iyang gipasabot nga lisod ang pagtukod og kaso sa nasud ilabi na kay natangtang na ang mga ebidensiya nga makapalig-on sa kaso batok sa kanhi presidente.
