Nagtuo si kanhi presidential spokesperson Harry Roque nga dili tugotan sa International Criminal Court (ICC) ang hangyo sa prosekusyon nga dawaton ang narekord nga mga testimonya sa duha ka saksi sa kasong crimes against humanity batok kang kanhi President Rodrigo Duterte nga wala moagi sa cross-examination.
Gibanabana ni Roque nga aduna’y 80% nga tsansa nga ibasura sa korte ang maong hangyo.
Matod niya, kinahanglang hatagan og katungod ang depensa nga masusi ug mapangutana ang mga saksi, ilabi na kay ang ilang mga pahayag direktang naglambigit kang Duterte sa mga pagpatay atol sa giyera batok sa ilegal nga droga.
Usa usab kini sa mga pangunang argumentong gigamit sa grupo sa depensa ni Duterte, sa pagpanguna ni British lawyer Peter Haynes, kinsa hugot nga misupak sa pagdawat sa narekord nga mga pahayag nga walay personal nga pagsubay sa mga saksi sa ICC Trial Chamber III.
Gihimug-atan ni Roque nga mahinungdanon ang cross-examination aron masukod ang kredibilidad sa mga saksi ug makita ang mga panagsumpaki sa ilang testimonya.
Hinuon, gipatin-aw niya nga ang katapusang hukom magdepende ra gihapon sa mga hurado sa ICC.
