Nagpadayon ang pagpangandam sa kampo sa prosekusyon, lakip si Atty. Neri Colmenares, alang sa pormal nga pagdungog sa International Criminal Court (ICC) batok kang kanhi Presidente Rodrigo Duterte karong Nobyembre 30.
Matod ni Colmenares, aduna pay daghang mosyon ug isyu nga naghulat sa desisyon sa korte sa dili pa magsugod ang hearing.
Lakip sa mga nag-unang hisgotanan ang pagpanalipod sa pagkatawo ug kaluwasan sa gibana-banang 70 ka saksi nga andam ipresentar sa prosekusyon.
Nangayo ang ilang kampo og protective order, lakip ang paggamit sa sound distortion, pagtago sa mga ngalan, ug dili pagpakita sa mga nawong sa mga saksi.
Gisugyot usab sa prosekusyon ang paggamit sa sinulat nga mga affidavit sa mga saksi nga na-interview na aron mapadali ang proseso ug makadiretso sa cross-examination.
Apan, gibatikos ni Colmenares ang kampo sa depensa tungod sa ilang giingong pagsupak sa mga lakang nga gitumong sa pagpaspas sa husay.
Nag-atubang si Duterte og kasong crimes against humanity nga may kalabotan sa iyang kampanya batok sa ilegal nga droga atol sa iyang pagkapresidente.
