Nimando si Cebu Provincial Governor Pamela “Pam” Baricuatro nga i-realign ang pundo sa Pasigarbo ug Suroy-suroy ngadto sa Healthcare Programs sa Kapitolyo.
Agi kini og pagtuman sa saad sa nakalabayng pangampanya sa gobernadora diin ang nakalabayng administrasyon ni Former Cebu Governor Gwendolyn Garcia kay migahin og minilyon nga budget para sa iyang tourism flagship programs nga mao ang Pasigarbo ug Suroy-suroy.
Apan mitataw si Baricuatro nga dili niya mapugngan ang staging sa Pasigarbo ug Suroy-suroy karong tuiga tungod aprobado na ang gigahin nga pundo niini gani covered pani og ordinansa sa Hunta Probinsya.
Malaumon ang gobernadora sa bag-ong Cebu Provincial Board nga andam muduyog sa iyang tinguha aron maamendar o ma-repeal ang ordinansa sa paggasto sa panudlanan sa Kapitolyo sa Pasigarbo ug Suroy-suroy.
Hinaot ni Baricuatro nga sa sunod tuig kay iyang mga plano na ang matuman nga mao ang pagpalambo sa Healthcare Programs ug sa Provincial and District Hospitals nga gidumala sa Kapitolyo sa nagkadaiyang dapit sa Sugbo ang maduso og makaserbisyo sa mga Sugbuanon.
