Nag-awhag na sa publiko ang Kagamhanang Lalawigan sa Sugbo sa mga aplikante alang sa pagpang-hire og dugang Medical Personnel nga ideploy sa mga nagkadaiyang tambalan sa probinsya nga gidumala sa Kapitolyo.
Kini nga pahibalo gisapublikar sa Cebu Province Public Information Office Facebook Page diin nahisubay sa kamaduan ni Cebu Provincial Governor Pamela “Pam” Baricuatro sa mass hiring aron pagpuno sa mga bakanteng posisyon sa 16 ka mga Capitol-run hospitals sa nagkadaiyang dapit sa probinsya.
Sa detalye niini, adunay 1,667 ka mga bakanteng posisyon diin 1,513 niini kay aduna nay pundo samtang ang nahabiling 154 ka slots kay nanginahanglan pa og dugang alokasyon.
Sumala pa ni Aldwin Empaces, ang Assistant Provincial Administrator nga ang marching order ni Gov. Baricuatro kay matuman dayon kini aron sa hingpit na makadalit og serbisyong medikal sa mga Sugbuanon.
Gani giklaro sab ni Empaces nga ang ihap sa mga personahe nga ipang-hire kay magdepended sa staffing requirements sa 4 ka mga provincial hospitals ug 12 ka mga district hospitals nga gidumala sa Kapitolyo.
Hinaot nila nga matuman dayon kini sulod sa unang 100 ka adlaw sa panggamhanan.
Ang assessment sa mga aplikante kay pagadumalaon sa Department of Health Central Visayas (DOH-7) ug sa Cebu Provincial Health Office (CPHO) diin ang ilang recommendations kay isumiter sa Office of the Governor para sa approval.
Ang mga bakanteng posisyon kay mao ang mga nurses, midwives, doctors, dentists, pharmacists, radiologists, administrative aides, engineers, laboratory technicians, sanitation inspectors, medical specialists, laundry workers, drivers, cooks ug uban pa diin ilang salary grade magdepende sa posisyon.
