Aduna nay natudlong bag-ong mangulo sa Office of the Senior Citizens Affairs (OSCA) sa kagamhanang dakbayan sa Sugbo.
Kini ang gipahibalo ni Former Executive Head sa maong buhatan nga si Chito Aragon atol sa eksklusibong pakighinabi sa Bombo Radyo Cebu Newsteam diin gisaysay niini nga ang iyang pagpanamilit sa pwesto isip labaw sa maong departamento nga nagserbisyo sa mga senior citizens sa dakbayan.
Gani mainitong gi-abi-abi niini ang bag-ong mangulo sa maong buhatan nga si Tessie Fernandez nga maghupot sa titulong Officer-in-Charge (OIC) sa Cebu City OSCA diin gikuha kini gikan sa buhatan sa Department of Social Welfare Services (DSWS) nga maoy mando sa bag-ong administrasyon nga nagdumala sa Cebu City Hall ug nakaserbisyo pa sa OSCA pipila ka tuig nang milabay.
Gipasalamatan ni Aragon ang sulod sa 6 ka buwan nga pagpanguna sa kalihokan para sa mga katiguwangan sa syudad nga nahimong mahinungdanon ang tahas niya sa pwesto.
Mensahe niini sa publiko nga suportahan ang bag-ong liderato sa buhatan og ingon man padayon iyang serbisyo sa Kagamhanang Dakbayan isip sakop sa opisina ni Cebu City Councilor Pastor “Jun” Alcover sa Committee on Senior Citizens Affairs sa Legislative Department sa City Hall.
