Gustong ipa-postpone ni Acting Davao City Mayor Sebastian “Baste” Duterte ang gikatakda unta ilang charity boxing match ni Philippine National Police chief Gen. Nicolas Torre III karong adlawa sa Dominggo, Hulyo 26.
Kini ang gipamahayag ni Baste sa bag-o lang napost niini nga video sa social media app nga Facebook niadtong Sabado sa gabii nga tumong sa iyang sugyot nga pag-postpone kay mao ang iyang daw daghang buluhaton basta adlawng Dominggo.
Apan giklaro niini nga bakante siya sa mga adlaw sa Martes, Miyerkules, o bisan unsang adlawa basta dili lang Dominggo.
Gani matod pa niini nga para daw aduna pay daghang oras ika-practice ang iyang kaatbang nga hepe sa PNP nga daw ang mga “jab” kay kuwang pa og wala daw kiniy depensa.
Gisaway pag-usab ni Baste ang pamahayag ni Torre nga ang ilang away alang sa charity ug alang sa mga biktima sa bag-ohay nga tropical cyclones sa Metro Manila ug kasikbit nga mga probinsya.
Gihagit nalang niya si Torre nga magsumbagay nga walay nakatutok nga camera ug walay sul-ob nga boxing gloves aron masukod kinsay mas maayong laki kanila.
Ingon man mipasumbingay pa kini sa istorya nga kung mahitabo ang ilang binukbukay kay padad-on lang og bodyguard si Torre aron adunay makapa-admit niya sa tambalanan kung magkinaunsa ang resulta sa away.
Gilatid usab ni Baste ang kondisyon alang kang Torre nga ipa-ubos sa hair follicle drug test si Presidente Ferdinand Marcos Jr. ug uban pang elected officials sa dili pa ang gikasabutang sumbagay.
