Gisuguro sa Russia nga susihon nila pag-ayo ang kasabutan mahitungod sa kalinaw nga tali sa Armenia ug Azerbaijan diin gipangunahan kini sa Estados Unidos.
Apan, ang kaalyado sa Russia nga Iran kusganong nisupak sa mga plano alang sa usa ka bag-ong corridor sa utlanan ug gisuportahan kini ni US President Donald Trump.
Nahitabo kini pagkahuman sa usa ka kasabutan nga gipirmahan sa Washington kaniadtong Biyernes, Agosto 8, nga nagtumong sa pagtapos sa dugay na nga panagbangi tali sa Armenia ug Azerbaijan.
Ang kasabutan naglakip sa mga probisyon alang sa pagtukod sa usa ka transit corridor nga nagkonektar sa Azerbaijan ug sa exclave niini nga Nakhchivan, usa ka dugay nang gipangita nga proyekto sa Baku.
Subay niini, ang Estados Unidos adunay katungod sa pagpalambo sa koridor, nga gitawag nga “Trump Route for International Peace and Prosperity,” apan gisupak kini sa Iran.
Sumala ni Akbar Velayati, ang adviser ni Iranian Supreme Leader Ayatollah Ali Khamenei, niingon nga mahimo’g maghatag peligro sa seguridad sa rehiyon ug niinsistir nga dili mahitabo ang proyekto.
Kalabotan sa nahisgutan, gitino usab sa Moscow nga ginahanglan pa nga susihon pag-ayo ang mga detalye sa kasabutan, labi na ang isyu sa corridor.
Samtang sa pamahayag sa tigpamaba sa Russian Ministry of Foreign Affairs nga si Maria Zakharova, aduna nay mga kasabotan tali sa Russia, Armenia, ug Azerbaijan, busa dili pa klaro kung unsa ang epekto sa bag-ong kasabutan kanila.
Sa kalihokan usab sa US, gikalipay kini sa Azerbaijan ug Armenia, ug adunay mga analyst nga nihatag usab og pagtagad sa kakuwangan pa sa detalye niini ug sa posibilidad sa mga babag sa pagpatuman sa kasabutan, kay nitoo man kini sila nga ang kasabutan nagpakita lamang sa pagkunhod sa impluwensya sa Russia sa rehiyon, tungod sa gubat sa Ukraine.
