Mibutyag si Cebu City Councilor Jun Alcover, nga dili makatarungan ang gipatuman nga lakang sa Land Transportation Office-7 kini kabahin sa pagpanakop sa mga motorista nga wala pay orihinal nga plaka nga naglatas sa kadalanan.
Gi kuwestiyon kini ni Alcover, gumikan kay matud pa niini nga walay giluwat nga Memorandum ang central office sa buhatan ug nakamugna kini ug tumang kagubot ug grabeng kabalaka sa nga motorista.
Hinungdan nga naaghat kini sa paghimo ug previlage speech aron nga patambungon si LTO-7 Regional Director Glenn Galario, sa Cebu City Council aron sa pagpa-isplekar sa pagpatuman niini.
Gihimug-atan ni Alcover, nga kinahanglang nga mo patim-aw si Galario ug mga nagkalain-laing Dealers” sa konseho apan kung mapakyas kini sa pagtambong, mopasaka ug resolusyon si Alcover ngadto sa LTO Central Office nga magrekomendar nga pailisan ang director.
Samtang sa pikas bahin, gibutyag niini nga padayun gihapon ang kampanya niini alang sa mga habal-habal drivers nga ipatuman ang lakang nga nagmando sa pag-accreditar sa mga drivers ngadto sa lokal nga kagamhanan, hilabi na sa paggamit ug mga IDs ug vest aron sa pag-organisar ug paglikay sa mga hinanggaw sa mga drivers. | Bombo Nathaniel Sandoval
