MANDAUE CITY,CEBU- Gisaway sa publiko ang mga opisyal ug kontraktor sa likod sa Butuanon River flood control project sa Barangay Casuntingan, human sa pagkahugno sa 15-metros nga bahin sa riprap atol sa kusog nga ulan niadtong Agosto 15, 2025.
Apan gibutyag ni Assistant District Engineer Eda de Guzman sa Department of Public Works and Highways (DPWH) Sixth Engineering Office nga dili substandard nga materyales ang hinungdan sa insidente, kundili ang kusog nga tubig-baha nga gikan sa kabukiran.
Matod ni De Guzman, ang tubig misulod sa likod sa estruktura pinaagi sa usa ka temporaryo nga access road, hinungdan nga napahuyang ang likod nga bahin sa riprap. Wala kini damha sa orihinal nga disenyo sa proyekto.
Gipasabot usab niya nga ang reinforcement bars gibutang lamang sa ubos nga bahin sa estruktura, ug wala sa ibabaw, subay sa mga sumbanan sa engineering. Ang maong disenyo gitumong sa kalig-on ug epektibong pagpugong sa baha.
Ang riprap nga nahimutang daplin sa Butuanon River adunay gitas-on nga unom (6) ka metro, ug gibase kini sa labing taas nga lebel sa tubig nga natala nga miabot og upat (4) ka metro. Gidisenyo kini aron makasugakod sa kasagarang tubig-baha sa lugar.
Gipasiugda sa opisyal nga ang proyekto gihimo subay sa giaprobahan nga disenyo ug engineering standards, ug wala’y pakyas sa kalidad sa mga materyales nga gigamit.
