CEBU CITY- Nadala sa tambalanan ang lima (5) ka mga estudyante samtang kapin 40 ang nakuyapan human sa nahitabong stampede sa Pardo National High School (Night Class) kagabii, Agosto 29, atol sa ilang pagsaulog sa Buwan ng Wika.
Sa pakighinabi sa Bombo News Team, si Dr. Salustiano Jimenez, Regional Director sa Department of Education (DepEd) Region 7, mipahibalo nga maglunsad sila og imbestigasyon kalabot sa maong insidente.
Gisaysay ni Jimenez nga base sa inisyal nga report, ang kagubot nahitabo sa dihang nanggawas na ang daghang estudyante, ug mga magtutudlo gikan sa culminating activity sa eskwelahan.
Apan, nahimong gubot ug dinasmagay ang kahimtang dihang nagdali og gawas ang mga estudyante, nga misangpot sa pagkadagma sa uban.
Dugang pa, ang uban nakuyapan tungod sa kakulba ug kakapoy sa pagpanglusot sa naghuot nga dalan.
Samtang, gipasalig sa DepEd nga padayon ang ilang monitoring sa kahimtang sa mga nadala sa tambalanan ug gikalipay nga wala’y grabe nga kadaot ang naangkon sa mga estudyante.
Sa kasamtangan, padayon ang imbestigasyon aron masuta ang tinuod nga hinungdan sa stampede ug aron malikayan ang susamang insidente sa umaabot.
Wala pa magpagawas og opisyal nga pahayag ang administrasyon sa Pardo National High School, apan gikatakda ang pagpahigayon og internal review ug coordination meeting uban ang DepEd ug mga barangay officials.
