CEBU CITY- Misalmot ang PLM Cebu sa tibuok nasod nga noise barrage karong adlawa, Septiyembre 12, 2025, aron iprotesta ang giingong korapsyon sa pondo sa flood control.
Nagtapok ang mga raliyista atubangan sa SSS Main Office sa Osmeña Blvd sa alas 9 sa buntag ug nagmartsa paingon sa Metro Gaisano-Colon alang sa usa ka hamubo nga programa ug noise barrage sa alas 10.
Tulo ka lalaki nga nagsul-ob og kostyum sa politiko, opisyal sa gobyerno, ug kontraktor nga nakaposas ang nagsimbolo sa mga nalambigit sa maong eskandalo.
Sa pakighinabi sa Bombo Newsteam, si Teody Navea, General Secretary sa Partido Lakas ng Masa, mitino nga kinahanglan adunay manubag sa pagpangawkaw sa pondo nga giingong nakaangkon og bilyones nga kadaot sa katawhan.
Sa pikas bahin, nagtapok ang mga motorista sa atubangan sa buhatan sa LTO-7 sa N. Bacalso Avenue aron ipanawagan nga hunungon ang pagpangdakop sa mga rider nga giingong gipangdakop bisan og walay igong rason.
Si Magno Delicano, 60 anyos ug usa ka rider sulod sa duha ka tuig, misaway sa giingong gipasiugdahan nga operasyon sa LTO-7 batok sa mga angkas ug habal-habal driver.
Matod ni Delicano, dako og epekto sa ilang panginabuhi ang operasyon, kay gikumpiskar ang ilang lisensya ug gi-impound ang ilang mga motorsiklo.
Giawhag niya ang LTO-7 ug ang Nasyonal nga Gobyerno nga makig-diyalogo kanila kaysa targeton ang mga ordinaryong rider.
