Gi-postpone sa Sandiganbayan Special Third Division ang gikatakdang promulgation sa hukom sa 15 ka graft cases batok ni kanhi Senate President Juan Ponce Enrile, kanhi chief-of-staff Jessica “Gigi” Reyes, negusyante nga si Janet Lim-Napoles, ug uban pa kalabot sa sayop nga paggamit sa P172 milyones nga PDAF o pork barrel funds.
Matod ni Atty. Dennis Pulma, clerk of court sa Sandiganbayan Third Division, ang bag-ong petsa sa promulgation gitakda sa Oktubre 24, 2025, diin matod niya nga usa ka “reflection” ang gisang-at sa usa sa mga mahistrado sa Special Division, mao nga kinahanglan nga i-postpone ang pagbasa sa desisyon aron mahatagan ang hingpit nga deliberasyon.
Si Enrile, 101 anyos, ug Napoles nitambong sa promulgation online, samtang personal nga nitambong si Reyes ug ubang mga akusado
Una nang niingon si Reyes niadtong Nobiyembre 2023 nga wala siya konsultaha sa gipirmahan nga suwat ni Enrile ngadto sa Commission on Audit (COA) niadtong 2012, diin iyang gikompirmar ang mga pirma sa iyang mga kawani nga gigamit sa endorsement letter sa mga NGO nga gidumala ni Napoles
Samtang, ang prosekusyon nipresentar og mga ebidensiya sama sa sulat ni Enrile niadtong 2008 ngadto kang kanhi Budget Secretary Rolando Andaya Jr., diin iyang gihangyo ang pagpagawas sa iyang PDAF alang sa mga proyekto nga gipatuman sa mga NGO nga nalambigit kang Napoles.
Nitestigo usab ang mga opisyal sa DBM ug COA, ingon man ang pipila ka mga municipal agriculturists gikan sa mga probinsya nga makadawat unta og mga agricultural packages ug livelihood projects. Matod nila, wala nila madawat ang mga benepisyo nga nalatid sa mga dokumento kalabot sa PDAF ni Enrile.
