Gikonsiderar gihapon sa Philippine National Police (PNP) nga “generally peaceful” ang “Trillion Peso March” nga gipahigayon gahapon Setyembre 21.
Mao kini ang gipaambit ni Acting PNP Chief Lt. Gen. Jose Melencio Nartatez Jr., nga ang mga kagubot nga mitumaw kay makonsiderar lang nga ‘isolated cases’.
Hinungdan nga gidayeg niini ang mga kapulisan nga nisiguro sa kalinaw ug kahapsay sa bag-o lang nahuman nga rally.
Basi sa taho sa PNP nga 61,605 ka mga nagprotesta ang misalmot sa tibuok nasod, diin 33,720 niini sa Metro Manila ug 27,885 sa ubang rehiyon.
Kapin sa 50,000 ka mga pulis usab ang ilang gipakatap, diin 29,300 niini anaa sa Metro Manila isip kabahin sa Civil Disturbance Management (CDM) Units.
Pipila sa mga insidente nga natala sa kapulisan naglakip sa pagbato sa mga polis ug pagsunog sa trailer truck duol sa Ayala Bridge sa Manila.
Agig tubag, nakasikop sila og 49 ka mga tawo, lakip ang 13 ka mga menor de edad, sa mga kasong illegal assembly, direct assault, malicious mischief, ug resistance to authorities.
Ingon man nga mokabat sa 70 ka mga sakop sa Manila Police Districts ang nasamdan sa paggukod sa mga manggugubot.
