PNP, doble ang pagbantay sa publiko atol sa ‘Ber’ months

Gidoble sa Philippine National Police (PNP) ang ilang presensya sa mga lugar nga daghang tawo sukad nagsugod ang ‘Ber’ months.

Sumala sa hepe sa PNP nga si Police General Jose Melencio Nartatez Jr., iyang gimandoan ang tanang pulis sa rehiyon ug siyudad nga pahugtan ang ilang police visibility, pagpatrolya ug pagbantay sa mga establisemento.

Bantayan usab nila ang mga terminal sa transportasyon ug uban pang pampublikong lugar nga kanunay bisitahon sa mga tawo.

Gilauman nga karong bulana, modaghan usab ang mga kawatan nga mopahimulos sa mga lugar nga kanunay bisitahon sa mga tawo.

Giklaro usab sa hepe sa PNP nga ang mga pulis nagbantay sa tibuok tuig aron masiguro ang kaluwasan sa publiko.