CENTRAL VISAYAS- Giawhag sa PAGASA Central Visayas ang publiko nga padayon nga magbinantayon ug magmatngon sa lakat sa panahon ning adlaw sa Setyembre 26, 2025.
Ingon man batasunon ang pagsubay sa mga lehitimong mga social media platforms ug mga agency particular na ang DOST-PAGASA website diin kanunay nga adunay updates sa bagyo aron malikay sa mga sayop nga impormasyon.
Mao kini ang pahimangno ni Chief of PAGASA Central Visayas Alfredo Quiblat Jr., atol sa pakighinabi sa Bombo Newsteam diin iyang gidasig ang publiko nga magpabilin sa ilang tagsa-tagsa ka panimalay ug likayan una ang paglakaw hilabi na kon dili kini importante.
Sa pikas bahin, gikumpirmar usab ni Col. Dennis Francis Pastor, ang head sa PDDRMO, Cebu nga anaa gihapon sa blue alert status ang PDDRMO ug naka-standby ang ilang mga personahe aron sa mga nagkinahanglan og tabang.
Dugang usab niini nga 24 hour monitoring ang ilang buhatan sa sitwasyon ug ingon man nga wala pa silay natala nga insidente may kalabutan sa kabangis sa Bagyong Opong.
Nakasinati usab og mga dagkong balod ang Seawall sa Pasil Fish Port karong adlawa diin daghang mga fish vendors ang nahasol ug nanihit ang mga customer.
Apan, naglaom gihapon sila nga mahurot ang ilang mga nakuhang isdang paninda.
