Gidunggab-patay sa iyang ka live-in ang usa ka 43-anyos nga magtutudlo sa usa ka public school, kini atol tunga-tunga sa init nga panaglalis sa duha sulod sa ilang panimalay sa Sitio Sambag, Barangay Tubod, Minglanilla, Cebu niadtong Lunes, Oktubre 6.
Sa ekslusibong pakighinabi sa Bombo Radyo Cebu team kang PLTCOL Maria Theresa Macatangay ang Hepe sa Minglanilla Municipal Police, ang biktima nakabsan sa kinabuhi tungod sa 7 ka dinunggaban nga naangkon niini, kinsa giila sa mga sakop sa kapulisan nga si Melanie Lee Lastimosa, kini human gitoohang giatake sa iyang kaipon nga si Katherine Arcilla Retita, 42, walay trabaho ug residente sa susamang dapit.
Basi sa imbestigasyon sa kapulisan, ang magka live-in partner ilado nga kanunay managlalis, ug giingong mamun-og sa matang higayon sa panaglalis, ug niadtong mga alas 11:25 sa gabii sa Lunes, nagkainitay kini human nga nakaikyas ug nakagawas ang ilang binuhing iro sa ilang balay.
Sunod nga yugto, si Retita, kinsa giingong adunay impluwesnysa sa ilimnong makahubog, nagmalampusong nakuha ang nakaikyas nga iro, apan kadyut ang nilabay, na bayolente na kini ug ni hulga nga patyon si Lastimosa gamit ang kutsilyo.
Mao nga tungod sa kahadlok ug hulga nga nadawat ni Lastimosa, nang-lock kini sa balay ug daling nanawag sa sakop sa kapulisan aron manampit og tabang.
Apan, tumang kabalaka ang nabati ni Lastimosa sa dihang giilad siya ni Retita nga napaakan kini og bitin, hinungdan nga daling gi-ablihan ni Lastimosa ang pultahan, ug mas nidako ang ilang panaglalis hangtod nga niabot sa punto nga gidunggab sa makadaghang higayon Lastimosa.
Samtang, sa dihang niabot na ang nirespondeng sakop sa kapulisan, naabtan nalang nila si Lastimosa nga nagbuy-od ug naligo sa kaugalingong dugo .
Busa, dali kining nanawag og medikal nga tabang gikan sa medical team sa Bureau of Fire Protection (BFP), nga giingong maoy bugtong available nga emergency responders niadtong higayona.
Sunod niana, daling giablihan ug gisulod sa mga kapulisan ang balay sa magkalive-in, ug diha-diha gidakop dayun si Retita, ang suspek, nga nagtago sa usa ka kwarto.
Subay niini, nasakmitan sa mga otoridad gikan sa crime scene ang duha duguang kitchen knives nga gituohang gigamit sa pagdunggab kang Lastimosa, kinsa patay na dihang gidala sa Minglanilla District Hospital alas 12:50 sa kaadlawon niadtong Martes, Oktubre 7.
Nunot niini, nipirma ra usab ang kabanay ni Lastimosa nga nagtugot nga dili na ipaubos sa autopsy ang patayng lawas niini, samtang napadayon pa nga giimbestigahan sa kapulisan ang pagpatay kaniya.
