Mogahin ang Hunta Provincial sa Sugbo og P26 milyones aron itabang sa mga lugar sa Amihanang Sugbo nga grabeng naapektuhan sa magnitude 6.9 nga linog, niadtong Setyembre 30, 2025.
Kini ang gibutyag ni Cebu Vice Governor Anthony Glen Soco sa pakighinabi sa Bombo News Team, diin iyang giingon nga ang maong kantidad alang sa Disaster Response Fund, tungod kay nahurot na ang pundo sa mga lungsod ug sa Dakbayan sa Bogo nga naapektuhan sa maong katalagman.
Matod ni Soco, ang tanang mga miyembro sa Provincial Board nagkahiusa sa pag-apruba sa maong pondo gikan sa ilang panudlanan aron mapadali ang tabang ngadto sa mga apektadong dapit.
Dugang pa, nga gipanglantawan nga sa labing dali nga panahon, mahuman na ang proseso sa pagpagawas sa maong kantidad aron magamit dayon kini sa panginahanglanon sa katawhan.
Ang pondo gikatakdang gamitan sa emergency response operations, pagkaon, limpyo nga tubig, ug uban pang critical nga serbisyo alang sa mga biktima nga hangtod karon, nagpabilin sa evacuation centers ug temporary shelters.
Una niini, gilunsad sa kagamhanan sa lalawigan ang #KumbatiCebu Task Force (TF), usa ka inisyatiba alang sa recovery ug rehabilitation.
Gipahayag ni Assistant Provincial Administrator Aldwin Empaces nga ang maong task force gimugna aron maningkamot og pundo nga mokabat sa P200 milyones gikan sa nasudnong kagamhanan.
Giduso ang sugyot ngadto sa Department of Budget and Management (DBM) alang sa aprobasyon sa maong kantidad.
Sa nasangpit nga pondo, P50 milyones ang gilauman nga maggikan sa Office of the President, samtang ang nahibilin kuhaon sa nasudnong alokasyon sa rehabilitation fund.
