CEBU CITY- Gipadayag ni Jun Abines ang iyang baruganan nga may katungod ang katawhan sa pagpahayag sa ilang mga kasagmuyo batok sa mga opisyal sa gobyerno nga, sumala kaniya, wala nakapakita og igo nga serbisyo sa katawhan.
Usa sa mga isyung iyang gikuwestiyon mao ang pagdakop sa vlogger nga si Mike Romero nga gihimo sa kapulisan ug sa National Bureau of Investigation Cybercrime Division.
Nasikop si Romero human siya mag-post og litrato sa presidente nga gi-edit, diin adunay graphic nga pula nga pana nga naggikan sa pulong “Bogo” paingon sa ulo ni Pangulong Marcos, uban ang caption nga “Headshot.”
Matud ni Abines, dili kini angay silotan, tungod kay ang social media usa ka plataporma sa kagawasan sa pagpamulong, ilabi na kung ang mga komentaryo kay may kalabutan sa pamalaod sa usa ka opisyal sa gobyerno.
Gipasabot pa niya nga ang aksyon sa NBI batok kang Romero usa ka porma sa pagpanghadlok ug harassment, nga naghatag og “chilling effect”, usa ka kahimtang diin ang katawhan mahimong mahadlok na sa pagpahayag sa ilang opinyon.
Gisuportahan niya kini nga punto pinaagi sa paghinumdom sa iyang kaugalingong kasinatian sa pagpangdakop kaniadto ni kanhi PNP Chief Nicolas Torre III.
Bisan pa man sa mga kalihukan sa gobyerno batok sa ilang grupo, gibutyag ni Abines nga padayon silang mopadayag sa ilang kasagmuyo, ug dili kini mapugngan pinaagi sa pagpanghadlok o pagpanikas.
Sa laing bahin, sa isyu sa pagtudlo ni Boying Remulla isip Ombudsman, miingon si Abines nga wala nay ikatingala ang katawhan, kay klaro na para sa publiko nga kini kabahin sa plano sa administrasyon sa pagpanikas batok kang Bise Presidente Sara Duterte.
