Duha ka pulis ang naangol samtang usa ang napatay human sa pinusilay sa Franklin County, Pennsylvania sa Estados Unidos niadtong Huwebes, Oktubre 9, 2025.
Sumala sa usa ka inisyal nga taho gikan sa Pennsylvania State Police, pasado alas 6 sa gabii, duha ka mga pulis ang niresponde sa usa ka insidente sa pagpanulis, diin ang mga suspek misulay sa pagikyas nga misangpot kini sa ginukdanay sa dalan.
Human gamita ang spike strips sa pagpahunong sa sakyanan sa mga suspek, ang duha ka babayeng suspek mituman dayon sa mando sa awtoridad apan kalit nga nakigpinusilay ang lalaki nga suspek ngadto sa mga pulis hinungdan nga ilang gibawsan ug napatay ang suspek.
Daling gidala sa tambalanan ang duha ka pulis nga naangol, ug kasamtangang nagpaalim sa tambalanan.
Sa kasamtangan, wala pa gibutyag sa kapulisan ang identity sa mga pulis ug sa suspek samtang nagpadayon ang imbestigasyon sa maong insidente.
Sa usa ka post sa social media, ang Gobernador sa Pennsylvania nga si Josh Shapiro nagpahayag sa iyang panaghiusa ug pag-ampo alang sa dali nga pagkaayo sa mga nasamdan nga mga opisyal.
