Gipaniguro ni Cebu Governor Pamela Baricuatro nga mahatag ang tanang hinabang nga kwarta gikan sa mga nagkandaiyang local government units ug private sector ngadto sa mga biktima sa linog sa Northern Cebu.
Gikanayon sa gobernadora nga masumada ang tanan ug mahatod ang mga hinabang ug nipasalig nga ang nagkupot sa mga kwarta kay dili mapaingon sa bulsa sa mga mapahimuslanong mga politiko.
Gidugang sa opisyal nga lakip sa mga nag-monitor sa mga hinabang hilabi na sa financial kay gilangkuban sa Philippine National Police, Provincial government ug private sector aron masiguro gayud ang transparency.
Sa pikas bahin, gibisita ni Governor Baricuatro ang lungsod sa Tabogon ug Borbon aron sutaon ang kahimtang sa mga nag-unang imprastraktura nga naguba sa bag-ohay nga 6.9-magnitude nga linog.
Gisiguro usab niya nga adunay igong relief goods ug uban pang kinahanglanon alang sa mga bakwit nga komunidad sa matag lungsod.
Sa Tabogon, gitunol ni Baricuatro ang cash aid nga gidonar sa Misamis Occidental ug gisusi ang kahimtang sa munisipyo.
Human sa pag-obserbar sa mga empleyado sa munisipyo nga nagtrabaho ubos sa mga tolda isip temporaryo nga mga opisina, iyang gipasaligan nga usa ka mobile smart office unit ang ihatag karong adlawa.
Sa Borbon, nagpahigayon usab og ocular inspection si Gov. Baricuatro sa mga importanteng imprastraktura sa munisipyo.
