Mi-asumir si Kalookan Bishop Cardinal Pablo Virgilio David sa titular church niini sa Roma sumala pa sa taho sa Catholic Bishops’ Conference of the Philippines (CBCP) niadtong Lunes, Oktubre 20.
Ang maong simabahan kay mao ang Church of the Transfiguration of Our Lord Jesus Christ.
Opisyal nga gidawat ni David ang iyang pagka-miyembro sa clergy sa Roma atol sa seremonyas niini niadtong Dominggo, Oktubre 19.
Sa iyang homiliya, miawhag ang kardinal sa pag-ampo para sa Pilipinas ilabi na sa kabalaka niini sa nagkadakong kasuko sa katawhan batok sa kurapsyon sa kagamhanan ilabi na sa proyektong pang-imprastruktura.
Si David mao pa ang ikaduhang cardinal nga gi-assign sa Simbahan sa Church of the Transfiguration of Our Lord Jesus Christ. Siya ang mipuli kang Cardinal Pedro Rubiano Saenz sa Bogota, kinsa namatay niadtong Abril 2024.
Ang CBCP nag-ingon nga ang usa ka cardinal giisip nga honorary member sa clergy sa Roma, nga ang matag usa gihatagan ug titular church nga simbolikong nagsilbi isip pastor niini ug nagpaila sa iyang koneksyon sa pastoral nga ministeryo sa Santo Papa.
Gidugang niini nga ang bugkos sa cardinal sa iyang titular nga simbahan nagpadayon hangtod sa kamatayon, bisan human sa pagretiro gikan sa aktibong ministeryo.
Ang cardinal gilauman nga magsaulog sa Misa sa Roma matag karon ug unya isip timaan sa maong relasyon.
