NEGROS ISLAND- Nakatala og gagmay’ng pagbuto ang Bulkan Kanlaon sa Negros Island kagabii, Biyernes, Oktubre 24, sumala sa Philippine Institute of Volcanology and Seismology (Phivolcs).
Matod sa ahensya, misugod ang aktibidad pasado alas 8:05 sa gabii, diin ang bulkan mibuga og abo nga miabot sa 2,000 metros gikan sa bung-aw niini, nga dayon gipalid sa amihanang-sidlakang direksyon.
Nagpabilin ang Alert Level 2 sa Kanlaon, nga nagpasabot nga adunay kasarangan nga kalihokan ang bulkan ug posible pa ang kalit nga phreatic eruption.
Sumala ni Office of the Civil Defense (OCD) Regional Director Joel Erestain, ang pagbuto milungtad lang og pipila ka minuto ug mas mahuyang kini kumpara sa nahitabong pagsabog sa bulan sa Setyembre.
Tungod niini, gipahimangnoan ang publiko batok sa pagsulod sulod sa 4-kilometer radius nga Permanent Danger Zone (PDZ) ug gibawalan ang pagpalupad sa mga eroplano duol sa bulkan.
Gipasabot usab sa mga opisyal nga magsul-ob og mask ang mga residente, labi na sa amihanang-sidlakang bahin sa bulkan, aron malikayan ang epekto sa abo (ashfall).
Kahinumduman nga mibuga usab og abo ang Bulkan Kanlaon niadtong buntag sa Huwebes, Oktubre 23.
