Mitanyag ang Cebu City Police Office og P100,000 sa makatumbok sa primary suspect nga si Leonardo R. Manto Jr. o mas nailhan sa ngalan nga “Jun Manto” alang sa linuog nga pagpusil-patay kang Police Captain Joel Deiparine sa CIDG Regional Field Unit 7.
Gawas kang Police Captain Deiparine kay samdan usab ang kauban niini nga si Police Executive Master Sergeant Artchel Tero.
Sumala sa inisyal nga mga taho, ang mga suspek giingong nakabantay sa duha ka pulis samtang nag-surveillance sakay sa motorsiklo ug pag-abot sa lugar, ang mga suspek giingong miatake sa mga pulis ug mipauwan og bala, nga miresulta sa kamatayon ni Deiparine ug pagkaangol ni Master Sergeant Tero.
Gisuwayan pagdala sa tambalanan si PCPT Deiparine apan gideklarar kini nga dead on arrival sa Cebu City Medical Center (CCMC), samtang si PEMS Tero kasamtangang nagpaalim pa sa tambalanan.
Samtang, ang mga suspek giila nga sila si Leonardo Manto ug Renante Manto, mga residente sa Sudlon 2, samtang ang usa sa ilang mga kauban nakaikyas human sa insidente.
Pahimangno sa kapulisan alang sa mga adunay impormasyon kabahin sa maong suspek, mahimong moduol dayon sa labing duol nga Police Station o motawag sa 911.
