Giimbestigahan karon sa Department of the Interior and Local Government (DILG) ang pipila ka mga mayor ug representante sa Sugbo nga gikatahong milarga paingon sa Europa samtang nagbaguod sa kalisdanan ang probinsya tungod sa Bagyong Tino.
Matud ni Assistant Provincial Administrator Aldwen Empaces, nakadawat ang Kapitolyo og mando gikan sa DILG Central Office nga isumiter ang mga travel order ug uban pang dokumento nga may kalabotan sa biyahe sa mga lokal nga opisyal.
Lakip sa mga nakadawat og Foreign Travel Authority (FTA) gikan kang Gobernadora Pamela Baricuatro mao sila ni:
Catmon Mayor Avis Tuhan-Monleon
San Francisco Mayor Alfredo Arquillano Jr.
Tudela Mayor Greman Solante
Poro Mayor Edgar Rama
Pilar Mayor Manuel Santiago
Compostela Mayor Felijur Quiño
Liloan Mayor Aljew Fernando Frasco
Gawas sa mga mayor, gihatagan usab og travel authority si Provincial Board Member Andrei Duterte.
Gipangayo usab sa DILG ang mga dokumento aron susihon kon legal ba ang pagbiyahe sa mga opisyal samtang liboan ka mga Sugboanon ang nag-antos ug kapin sa usa ka gatos ang nakalas nga kinabuhi tungod sa bagyo.
Una na usab nga giklaro ni Gobernadora Baricuatro nga napirmahan ang mga travel authority sa wala pa miigo ang Bagyong Tino ug uban pang katalagman.
