Ipahunong ang tanang kalihokan sa Banat-i Hill sa dakbayan sa Tagbilaran, kini ang gi-sugyot ni Tagbilaran City Vice Mayor Adam Jala, nga paimbestigaran ang epekto sa padayong kalamboan sa lugar.
Gipadayag ni Jala, pinaagi sa iyang privilege speech nga ang Banat-i Hill mahimong “ghost project” sa Tagbilaran kon padayon kini nga gub-on ug pasagdan.
Gipasabot niini nga posibleng maparehas ang Tagbilaran sa trahedya sa Cebu atol sa Bagyong Tino, nga posibleng mosangpot sa pagbaha ug landslide ang gumikan sa pagkadunot sa mga bungtod.
Gisugyot usab sa konseho, ang pagtigum uban sa DENR, DPWH, MGB ug City Engineer aron masuta ang kalihokan sa Regional Cultural Hub project ug protektahan ang Banat-i Hill alang sa umaabot nga henerasyon.
Apan nasabutan sa provincial government, LGU sa Tagbilaran ug ubang ahensya sa Gobyerno nga usbon ang desinyo human sa panagtigum kagahapong adlawa.
Kahinumdoman nga niadong tuig 2021, sa dihang gihimo ang ground breaking una gisugdan ang pagtrabaho sa Regional Cultural Hub sa Banat-i Hill.
