Nipasidaan ang Independent Commission for Infrastructure (ICI) nga pasakaan og kasong criminal ug administratibo batok sa mga opisyal sa gobyerno ug mga kontraktor nga nagpaluyo sa napakyas nga mga proyekto sa flood control sa Cebu.
Kini human sa gipahigayon nga inspeksyon gahapong adlawa nga gipangulohan ni Baguio City Mayor Benjamin Magalong diin nakita ang mga seryosong kakulangan sa pagplano ug pagpatuman sa mga proyekto.
Sa nasudnong fact-finding body, nga gihimo ubos sa Executive Order No. 94 nga imbestigahan ang korapsyon ug mga iregularidad sa paggasto sa imprastraktura sa Sugbo, hilabi na sa Cebu City, Mandaue City, Talisay City, Liloan, ug Compostela, ang mga lugar nga labing naapektuhan atol sa Bagyong Tino (Kalmaegi).
Matud ni Rodolfo Azurin Jr., ICI special adviser ug lead investigator, nga ang ilang nakita kay igo na aron himuong sumbanan aron magpasaka og kaso gumikan sa dili maayo nga pagplano, dili husto nga pagkasunod-sunod sa proyekto, ug posibleng paggamit sa mga substandard nga materyales.
Apan, dugangh niini nga ang labing makaalarma, kay mao ang pagtipas sa Department of Public Works and Highways (DPWH) gikan sa national river-basin master plan, usa ka paglapas nga mahimong basehan sa tulubagon.
