Miabot og $706 milyon (P41.7-bilyones) ang surplus sa balance of payments (BOP) sa Pilipinas kaniadtong Oktubre, sumala sa Bangko Sentral ng Pilipinas (BSP).
Mas taas kini kaysa sa $82 milyon (P4.8-bilyones) niadtong Septyembre ug sukwahi sa $724 milyon nga deficit (P42.8-bilyones) sa samang bulan sa miaging tuig.
Kini usab ang pinakataas nga surplus nga natala sukad sa Pebrero diin miabot kini og $3.09 bilyon (P182.4-bilyones).
Ang BOP usa ka rekord sa tanang transaksyon sa nasud sa pamatigayon, serbisyo, kita, kapital, ug pamuhunan gikan sa gawas sa nasud.
Apan, nagpabilin ang kinatibuk-ang deficit nga $4.6 bilyon (P271.5-bilyones) gikan sa Enero hangtod Oktubre 2025, kon itandi sa surplus nga $4.39 bilyon (P259.4-bilyones) sa samang panahon sa 2024.
Gipasiugda sa BSP nga ang BOP importante isip sukdanan sa kahimsog sa ekonomiya ug sa relasyon sa Pilipinas sa merkado sa kalibutan.
