Nasikop ang anaa sa 20 ka marinong Pilipino human nasakmit sa mga awtoridad sa Nigeria ang labing menos 20 ka kilo nga cocaine nga gitago sa usa ka barko gikan sa Brazil paingon sa Lagos, matod sa National Drug Law Enforcement Agency (NDLEA) niadtong Biyernes.
Nakit-an ang taas nga kalidad nga cocaine sa usa ka Panama-registered vessel niadtong Domingo, nga gitago ilalom sa kargamento.
Wala gitino sa National Drug Law Enforcement Agency ang eksaktong sulod sa kargamento, apan giingon nga ang barko kasagaran nagdala og karbon sa ruta tali sa Brazil ug Colombia.
Ang mga Pinoy seafarer anaa na karon sa kustodiya alang sa imbestigasyon.
Kung kahindumduman, bag-ohay lang nga giingon sa National Drug Law Enforcement Agency nga nakigtambayayong kini sa mga ahensya sa anti-drug sa US ug UK aron imbestigahan ang usa ka cartel nga nalambigit sa pagpayuhot sa 1,000 ka kilo nga cocaine nga nadiskobrehan sa usa ka container sa pantalan sa Lagos.
