Gisugyot nga pasayohon ang iskedyul sa klase sa mga elementarya sa dakbayan sa Sugbo aron mamenosan ang exposure sa mga estudyante sa grabeng kainit sa panahon nga gilauman nga dala sa Super El Niño.
Lakip sa gisugyot nga mga lakang ang sayo nga face-to-face classes gikan Lunes hangtod Huwebes, samtang modular distance learning o MDL ang ipahigayon matag Biyernes.
Ang maong sugyot anaa sa resolusyon nga giandam ni Cebu City Councilor Dave Tumulak, diin gihangyo si Mayor Nestor Archival nga ikonsiderar ang pagpatuman niini sa koordinasyon sa Cebu City Schools Division Office.
Hisgotan sa Cebu City Council ang maong resolusyon atol sa regular session niini karong sa adlawng Martes sa hapon, Nobyembre 10.
Ubos sa gisugyot nga iskedyul, ipahigayon ang face-to-face classes gikan alas 5:30 sa kaadlawon hangtod alas 10 sa buntag, gikan Lunes hangtod Huwebes.
Nagkalahi usab ang gitakdang oras sa pagtudlo depende sa grade level sa mga estudyante.
Tulo ka oras ang klase sa kindergarten, upat ka oras ug 20 minutos sa Grade 1 ug Grade 2, upat ka oras ug 30 minutos sa Grade 3, samtang unom ka oras alang sa Grades 4, 5 ug 6.
Alang sa mga oras sa pagtudlo nga dili masakop sa gisugyot nga face-to-face schedule, gilauman nga maghatag ang mga eskwelahan og dugang nga mga pamaagi sa pagkat-on aron masiguro nga dili maputol ang edukasyon sa mga estudyante.
Samtang, nagpabilin nga ipailalom sa mga polisiya ug guidelines sa Department of Education o DepEd ang maong temporaryong kausaban ug dili kini angay makadaot sa kalidad sa edukasyon.
Mahinumdoman usab nga aduna nay gipagawas nga memorandum ang DepEd Memorandum No. 0969 niadtong Oktubre 26, 2026 kalabot sa four-level 4H Learning Modality Framework alang sa pagdumala sa epekto sa grabeng kainit ug uban pang posibleng kasamok sa klase atol sa school year 2026-2027.
Ubos niini, adunay upat ka lebel nga basihan sa mga eskwelahan sa pagdesisyon kon unsang learning modality ang angay ipatuman depende sa heat index.
Sa lebel nga “Hayag,” diin ubos sa 27 degrees Celsius ang heat index, mahimong ipadayon ang regular nga face-to-face classes basta adunay tukmang mga pag-amping.
Sa “Hinay” nga lebel, nga adunay heat index nga 27 hangtod 32 degrees Celsius, mahimong pamub-on ang oras sa face-to-face classes o magpatuman og hybrid ug home-based learning.
Sa “Hinga” nga lebel, diin moabot sa 33 hangtod 41 degrees Celsius ang heat index, kinahanglan nang suspinsuhon ang face-to-face classes ug ipatuman ang home-based learning arrangement.
Samtang sa pinakataas nga lebel nga “Hinto,” diin moabot sa 42 degrees Celsius pataas ang heat index, kinahanglan suspensyohan ang tanang academic activities, lakip na ang home-based learning.
Gipasabot nga bisan pa og maaprobahan ang gisugyot nga sayong iskedyul sa klase sa Cebu City, magpabilin gihapon nga sundon ang nasudnong guidelines sa DepEd.
Nagpasabot kini nga mahimo gihapon nga usbon o suspindihon sa mga eskwelahan ang face-to-face classes kon gikinahanglan tungod sa grabeng kainit sa panahon.
