Gipasalig sa Department of Trade and Industry (DTI) nga walay plano nga ipataas ang presyo sa mga batakang panginahanglan ug nag-unang palaliton, lakip ang bottled water, bisan pa sa gipaabot nga epekto sa Super El Niño sa nasud.
Matod ni DTI Secretary Maria Christina Roque, wala pa makadawat ang ahensya og hangyo gikan sa mga tiggama alang sa pagpataas sa presyo sa mga importanteng produkto.
Gipasalig usab ni Roque nga igo ang suplay sa mga palaliton sa merkado.
Padayon usab ang pagmonitor sa DTI sa sitwasyon ug ang pakig-alayon niini sa mga tiggama aron mapadayon ang kalig-on sa suplay ug presyo.
Nanawagan ang Sekretarya sa publiko nga likayan ang panic buying o sobra nga pagpamalit ug pagtigom og mga produkto aron malikayan ang posibleng kakulang sa suplay.
Samtang, gipahibalo sa DTI nga wala pa kini makarekord og kausaban sa presyo sa mga produkto alang sa panahon sa kapaskohan.
Padayon nga tutokan sa ahensya ang pagmonitor sa presyo sa mga batakang panginahanglan ug nag-unang palaliton.
