Nagpadayon ang pagsaka sa kaso sa leptospirosis sa Probinsya sa Sugbo gikan sa Nobyembre 1 hangtod 20, diin niabot na kini sa 117 ka mga kaso sumala sa officer-in-charge sa Integrated Provincial Health Office (IPHO) nga si Dr. Mary Ann Josephine Arsenal niadtong Biyernes, Nobyembre 21.
Sumala pa, sa 117 ka mga kaso, adunay 106 niini ang kompirmado, samtang adunay 11 usab ang nagpabiling natanggong sa hospital ug nagpabiling naghuwat sa laboratory validation.
Samtang, adunay natala usab ka 7 ka mga namatay sulod sa maong period.
Sa pikas bahin, ang Health officials nag-ingon nga ang pagsaka gilauman tungod kay ang mga bag-ong impeksyon nagsugod na sa pagtungha sulod sa tipikal nga incubation window human sa kaylap nga pagbaha.
Hinungdan nga ang ospital sa tibuok Sugbo, pampubliko man o pribado, gibutang sa taas nga alerto samtang nangandam sila sa posibleng pagdagsa sa mga pasyente nga nagpakita og mga sintomas sa leptospirosis.
Sa sayo pa, ang mga opisyal sa panglawas nakadokumento og 23 ka mga impeksyon nga kasagaran anaa sa Dakbayan sa Mandaue ug Consolacion, kinsang mga dakbayan nga labing nakoso-koso sa niadtong pag-igo sa Bagyong Tino.
Busa, ang mga ospital ug mga pasilidad sa panglawas gitambagan nga mangandam alang sa pagtaas sa mga gidudahang ug kumpirmado nga mga kaso sa leptospirosis.
Kahinomdoman nga una nang nipahimangno si Llane J. Conception, ang Presidente sa OHNAP Cebu Chapter, ug kini nunot nga adunay kinabuhing natuldokan tungod sa maong matang sa sakit, nunot na sa exposure niini sa tubig-baha nga gipahinabo ni bagyong Tino niadtong Nobyembre 4.
