Gidepensahan ni General Nicolas Torre III ang aksyon sa Philippine National Police (PNP) sa pagserbisyo sa warrant of arrest sa mga nailhan nga address ni kanhi Ako Bicol Party-List Representative Zaldy Co, bisan pa nga nahibaw-an nga anaa kini siya sa gawas sa nasud. Matod niya, normal kini nga bahin sa due process.
Giapil usab sa gipangita ang 17 ka opisyal sa DPWH nga nalambigit sa giingong korapsyon sa mga flood-control projects.
Sa iyang eksklusibong interbyu sa Bombo Radyo, gipasabot ni Gen. Torre nga obligasyon sa kapulisan ang paghatud sa warrant sa registered addresses sa akusado ug ang pag-file dayon og report sa korte human sa pipila ka adlaw.
Ang kaso mitumaw gikan sa mga proyekto sa imprastraktura nga giingong “ghost projects” ug substandard works.
Human makolekta ang ebidensya gikan sa DPWH ug sa Independent Commission for Infrastructure, gipasaka sa Ombudsman ang kasong graft.
Nagpagawas usab ang Sandiganbayan og Hold Departure Order (HDO) aron masiguro nga motubag ang mga akusado sa ilang kaso.
Gipasiugda sa PNP nga walay espesyal nga trato nga gihatag sa bisan kinsa ug nga ang ilang aksyon nagtuman lamang sa proseso ug sa balaod.
