Gitanyagan sa P2 milyones nga ganti sa bisan kinsa nga makahatag og impormasyon bahin sa mga suspek ug mastermind sa pagpatay kang Barangay Captain Oscar “Dodong” Bucol Jr. sa Tres de Mayo, Digos City.
Matod pa ni Atty. Israelito Torreon, ang legal counsel ni Bise Presidente Sara Duterte nga mipahibalo kini nga mohatag sila og P1 milyon nga ganti aron mailhan ang mga anaa sa likod sa krimen.
Samtang, si Davao del Sur Governor Yvonne Cagas mohatag usab og P1 milyon, uban ang P500,000 alang sa bisan kinsa nga makadakop sa gunman, ug P500,000 alang sa bisan kinsa nga makahatag og impormasyon bahin sa mastermind.
Daghang mga person of interest ang gipailalom usab sa paraffin test, lakip ang usa nga giingong gihisgutan sa biktima sa wala pa siya gipatay nga si P/LtCol. Peter Glenn D. Ipong.
Kapin sa 21 ka personnel ang gi-relibohan sa ilang mga pwesto aron masiguro nga dili maapektuhan ang nagpadayon nga imbestigasyon.
Giila sa mga imbestigador ang daghang posibleng motibo sa pagpatay, lakip ang personal nga panag-away, politika, sugal, ug negosyo.
Sumala sa pinakabag-ong update, nagpadayon ang pagreview sa CCTV aron mahibal-an ang posibleng mga ruta sa pagsulod ug paggawas sa mga sakyanan sa mga suspek.
Sa usa ka opisyal nga pahayag, giila sa LGU si Kapitan Bucol dili lamang isip usa ka lider sa barangay, apan usa usab ka haligi sa komunidad, usa ka higala, ug usa ka matinud-anon nga alagad sa publiko nga kinasingkasing ug makanunayon nga nagserbisyo sa iyang mga konstituwente.
Gitawag sa LGU ang insidente nga usa ka dakong trahedya alang sa Barangay Tres de Mayo, ug nangayo sila og kompleto, patas, ug paspas nga imbestigasyon gikan sa mga awtoridad.
