Gitarget sa bag-ong fire marshall sa Carcar City Fire Marshall ang mga kabatan-onan nga mabansay pinaagi sa tulo ka mga programa nga iyang giandam kalabot sa Sunog.
Atol sa pakighinabi sa Bombo Newsteam kang Engr. F/SINSP Archie Custodio, Carcar City Fire Marshall, gipaambit niini nga sa gilatid nila ngadto sa Mayor ang gitawag nila nga ‘Fire square road Show’ diin gitumong niini alang sa mga kabatan-onan.
Ingon man sa mga ginikanan gumikan matud sa opisyal nga usa kini ka ‘learning experience’ nga makita sa publiko ug sa mga bag-ong tubo kung unsa ang mga gibuhat sa mga sakop sa kabomberohan.
Gawas sa pagpakita sa kalibutan sa kabomberohan, lakip usab sa ilang ipaila-ila sa kabataan ang mga gibuhat sa kapulisan, BJMP, ingon man sa mga personnel nga gibutang sa trapiko, ug pag-demonstrate sa paghatag og first aid.
Gidugang usab ni Engr. Custodio nga dili lang ang road Show ang ilang gihan-ay gumikan anaa usab ang Sangguniang Kabataan Fire Olympics ug ang Kiddy fire Olympics aron ibansay ang mga Kabatan-onan sa paggamit og fire extinguisher.
Hilabi na nga gidesenyo kini alang sa Youth empowerment gumikan sila ang mamahimo nga mosagubang kon gani adunay motumaw nga sunog sa ilang dapit. via Bombo Koky Cabatingan
